پاکستان اور انگلینڈ کے درمیان دوسرے ٹیسٹ کے پانچویں روز کا کھیل بے نتیجہ ختم ہوگیا۔
بارش کے باعث پانچویں روز کا کھیل سوا چار گھنٹے کی تاخیر سے شروع ہوا اور صرف 32 اوورز کا کھیل ہی ممکن ہوا۔ خراب موسم کے باعث کھیل میں بار بار تعطل آنے کی وجہ سے انگلینڈ کی ٹیم اس میچ میں صرف ایک ہی اننگز کھیل سکی اور مجموعی طور پر 43.1 اوورز کا سامنا کیا۔ انگلینڈ نے 4 وکٹوں کے نقصان پر 110 رنز بنائے۔
اس سے قبل بھی اولڈ ٹریفورڈ میں جاری ٹیسٹ کے دوران روز تک بارش نے بھرپور مداخلت کی، پہلے روز 46 اور دوسرے روز صرف 40 اوورز کروائے جاسکے جب کہ تیسرے روز بارش کے باعث ایک اوور بھی نہیں کروایا جاسکا اور چوتھے روز پاکستانی ٹیم 236 رنز پر آؤٹ ہوگئی، محمد رضوان نے 72 رنز کی شاندار اننگز کھیلی۔
پانچویں روزانگلینڈ نے ایک وکٹ کے نقصان پر 7 رنز سے اننگز شروع کی اور کھیل کے اختتام پر 4 وکٹوں کے نقصان پر 110 رنز بنائے۔
پاکستان کی جانب سے محمد عباس نے 2 ، شاہین شاہ اور یاسر شاہ نے ایک ایک وکٹ حاصل کی۔
اس سے قبل پاکستانی ٹیم پہلی اننگز میں 236 رنز ہی بناسکی تھی،محمد رضوان 72، عابد علی 60 اور بابر اعظم 47 رنز بناکر نمایاں رہے، شاندار کارکردگی پروکٹ کیپرمحمد رضوان کو مین آف دی میچ قرار دیا گیا۔
میچ ڈرا ہونے کی صورت میں دنوں ٹیموں کو 13، 13 پوائنٹس دیے گئے ہیں جب کہ 3 ٹیسٹ کی سریز میں میزبان انگلینڈ کو 0-1 کی برتری حاصل ہے۔
سیریز کا تیسرا اور آخری ٹیسٹ 21 اگست سے شروع ہوگا۔
