زمبابوے کے خلاف پاکستان کا ریکارڈ شاندار
سید پرویز قیصر
پاکستان اور زمبابوے کے درمیان تین ایک روزہ بین الاقوامی میچوں کی سریز کاپہلا میچ جمعہ (30 اکتوبر) کو راولپنڈی کرکٹ اسٹیڈیم میں کھیلا جائے گا۔ اس سریز کے باقی دو میچ بھی اسی میدان پر ہونگے۔
پاکستان اور زمبابوے کے مابین ہونے والا یہ پاکستان میں بیسواں اور کل ملاکر60 واں ایک روزہ بین الاقوامی میچ ہوگا۔
دونوں ٹیموں کے مابین ابھی تک جو 59 ایک روزہ بین الاقوامی میچ کھیلے گئے ہیں اس میں پاکستان نے52 میں کامیابی حاصل کی ہے۔ زمبابوے نے سرف چار میچ جیتے ہیں۔ ایک میچ ٹائی رہا ہے جبکہ دو میچ نامکمل رہے ہیں۔
اپنے گھر پرپاکستان نے زمبابوے کے خلاف 19میں سے سترہ میچ جیتے ہیں۔ زمبابوے نے ایک میچ میں جیت حاصل کی ہے جبکہ ایک میچ نامکمل رہا ہے۔
زمبابوے نے پاکستان کے خلاف آخری کامیابی 27 اگست 2013 کو ہرارے میں حاصل کی تھی جس کے بعد پاکستان نے تیرہ میچ جیتے ہیں اور ایک میچ برابر رہا ہے۔
دونوں کے درمیان جولائی2018 میں جو آخری سریز زمبابوے میں کھیلی گئی تھی اس میں پاکستان نے5-0 سے کامیابی حاصل کی تھی۔
پاکستان کا زمبابوے کے خلاف سب سے زیادہ اسکور50 اوور میں ایک وکٹ پر399 ہے جو اس نے بلاوایو میں 20 جولائی2018 کو بنایا تھا۔ زمبابوے کا پاکستان کے خلاف سب سے زیادہ اسکور50 اوور میں پانچ وکٹ پر334 ہے جو اس نے لاہور میں 26 مئی2015 کو بنایا تھا۔
بلاوایو میں 18 جولائی2018 کو کھیلے گئے میچ میں زمبابوے کے سبھی کھلاڑی25.1 اوور میں 67 رن بناکر آوٹ ہوئے تھے جو اس کا پاکستان کے خلاف سب سے کم اسکور ہے۔پاکستان کا زمبابوے کے خلاف سب سے کم اسکور43.3 اوور میں 148 ہے جو اس نے ہرارے میں 26 فروری 1995 میں بنایا تھا۔
یہ بھی پڑھیں زمبابوے کے خلاف 15 رکنی قومی ون ڈے اسکواڈ اعلان
ایک روزہ بین الاقوامی میچ میں پاکستان کے لئے واحد ڈبل سنچری فخر زمان نے بنائی ہے۔ انہوں نے زمبابوے کے خلاف بلاوایو میں 20 جولائی2018 کو 156 بالوں پر 24 چوکوں اور پانچ چھکوں کی مدد سے آوٹ ہوئے بغیر 210 رن بنائے تھے۔
زمبابوے کی جانب سے پاکستان کے خلاف سب سے بڑا اسکور کرنے کا اعزازایلٹن چگمبورا کے پاس ہے جنہوں نے لاہور میں 26 مئی2015 کو95 بالوں پر دس چوکوں اور چار چھکوں کی مدد سے 117 رن بنائے تھے۔ یہ انکا ایک روزہ بین الاقوامی کرکٹ میں بھی سب سے زیادہ اسکور ہے۔
یاسر شاہ نے ہرارے میں یکم اکتوبر 2015 کو کھیلے گئے میچ میں 9 اوور میں 26 رن دیکر چھ کھلاڑیوں کو آوٹ کیا تھا جو پاکستان کی جانب سے زمبابوے کے خلاف سب سے اچھی بالنگ کارکردگی ہے۔
زمبابوے کی جانب سے پاکستان کے خلاف سب سے اچھی بالنگ کا ریکارڈ ہیتھ اسٹریک کے پاس ہے جنہوں نے شارجہ میں 9 اپریل 1997 میں 18 رن دیکر چار کھلاڑیوں کو آوٹ کیا تھا۔ فیصل فیچرس
