سابق کپتان وسیم اکرم نے کہا ہے کہ انگلینڈ کے خلاف 13 اگست سے شروع ہونے والے دوسرے ٹیسٹ میچ میں فواد عالم کو ٹیم میں شامل کرنا چاہئے۔
نجی ٹی وی چینل سے گفتگو کرتے ہوئے وسیم اکرم نے کہا کہ دوسرے ٹیسٹ میں ٹرننگ وکٹ ہوگی اس لئے قومی ٹیم کو ایک ا سپنر کے ساتھ میدان میں اترنا چاہیے اور پاکستان کو ایک اضافی بلے باز کے ساتھ کھیلنا پڑے گا سوئنگ کے سلطان نے کہا کہ فواد عالم کی فرسٹ کلاس میں 50 فیصد سے زیادہ اوسط ہے اور دوسرے ٹیسٹ میں انہیں موقع دیا جانا چاہئے۔ انہوں نے کہا اگر میں کپتان ہوتا تو فواد عالم کو مڈل آرڈر میں شامل کرتا۔ پہلے ٹیسٹ میچ میں مہمان ٹیم پہلے ہی 3 وکٹوں سے ہار چکی ہے ۔
وسیم اکرم نے پہلے ٹیسٹ میں شکست کا ذمہ دار بلے بازوں اور بولرز کو قرار دیا۔ سابق کرکٹر نے کہا ہم نے دوسری اننگز میں بولنگ کے دوران بہت غلطیاں کیں۔ انہوں نے کہا کہ2 سینئر بلے باز اظہر علی اور اسد شفیق نے کارکردگی کا مظاہرہ نہیں کیا اور اگر آپ کے سینئر کھلاڑی کارکردگی کا مظاہرہ نہیں کرتے ہیں تو ٹیم کا حوصلہ پست ہوجاتا ہے۔
وسیم اکرم نے کہا کہ اظہر علی کو اپنی باڈی لینگویج اور کمیونیکیشن سکلز کو بہتر کرنے کی ضرورت ہے اگر ہم باقی ٹیسٹ میچ جیت جاتے ہیں تو انہیں کپتان کی حیثیت سے برقرار رکھنے میں کوئی حرج نہیں اور یہ ان کی کارکردگی پر منحصر ہے۔ اگر ہم نہیں جیتتے اور وہ کارکردگی کا مظاہرہ نہیں کرتے تو ظاہر ہے کہ پاکستان کرکٹ بورڈ کو کسی اور کی تلاش کرنا ہوگی۔
