نیوزی لینڈ کے دورہ پاکستان کے لیے گرین شرٹس کے غیر ملکی کوچز 11 اپریل کو پاکستان پہنچ جائیں گے۔
میڈیا ذرائع کے مطابق گرانٹ بریڈبرن اور اینڈریو پیوٹک قومی وائٹ بال اسکواڈ کو 11 اپریل کو جوائن کرلیں گے، گرانٹ بریڈ برن کو قومی کرکٹ ٹیم کا ہیڈ کوچ مقرر کیا جانے کا امکان ہے۔
میڈیذرائع کا کہنا ہے کہ اینڈریو پیوٹک کو نیوزی لینڈ کے خلاف سیریز کے لیے بیٹنگ کوچ مقرر کیا جائے گا، جبکہ سیریز میں عمر گل قومی وائٹ بال اسکواڈ کے بولنگ کوچ ہوں گے۔
ذرائع کے مطابق عمر گل 6 اپریل سے قدافی اسٹیڈیم لاہور میں ٹریننگ کیمپ میں شرکت کریں گے۔
دوسری جانب نیوزی لینڈ کے دورہ پاکستان کے دوران مکی آرتھر کے بھی پاکستان پہنچنے کے امکانات نظر آ رہے ہیں۔
مکی آرتھر کی 6 اپریل سے ڈربی شائر کے ساتھ کاؤنٹی چیمپئن شپ میں مصروفیات شروع ہونگی، مکی آرتھر کاؤنٹی چیمپئن شپ کے دوران پاکستان کا دورہ کرسکتے ہیں۔
ذرائع کا کہنا ہے کہ مکی آرتھر کے اپریل کے تیسرے ہفتے میں پاکستان کا دورہ کرنے کے امکانات ہیں، پی سی بی مکی آرتھر کو قومی کرکٹ ٹیم کا ہیڈ کنسلٹنٹ بنانے کا خواہشمند ہے۔
