مانچسٹر:تین میچوں پر مشتمل ٹیسٹ سیریز کے تیسرے روز کے اختتام پر پاکستان نے اپنی دوسری اننگز میں آٹھ وکٹوں کے نقصان پر 137 رنز بنا لیے ہیں۔
قومی ٹیم کو انگلینڈ کے خلاف میچ میں 244 رنز کی برتری حاصل ہے جب کہ اس کی دو وکٹیں ابھی باقی ہیں۔
اس وقت کریز پر یاسر شاہ اور محمد عباس موجود ہیں۔ اسد شفیق 29 اور محمد رضوان 27 رنز بنا کر آؤٹ ہوئے ہیں۔
بین سٹوکس، سٹیورٹ براڈ اور کرس ووکس نے دو، دو پاکستانی بلے بازوں کو آؤٹ کیا ہے جبکہ ڈوب بیس نے ایک وکٹ حاصل کی ہے۔
قومی ٹیم نے اپنی دوسری اننگز کا آغاز 107 رنز کی برتری پر کیا، پہلی اننگز میں شاندار سنچری اسکور کرنے والے اوپنر شان مسعود دوسری اننگز میں بغیر کھاتا کھولے اسٹورٹ براڈ کی باہر جاتی گیند پر کیچ آؤٹ ہو گئے۔
ان کے بعد عابد علی ڈوم بیس کو جارحانہ شاٹ مارنے کی کوشش میں 20 رنز بنا کر کیچ آؤٹ ہوگئے۔ بابر اعظم 5 کے انفرادی اسکور پر کرس ووکس کی گیند پر سلپ پر کیچ آؤٹ ہوئے۔
کپتان اظہر علی 54 گیندوں پر 18 رنز بنانے کے بعد کرس ووکس کی گیند پر ایل بی ڈبلیو ہوگئے۔
پاکستان کے 326 رنز کے جواب میں تیسرے روز انگلینڈ کی ٹیم 219 رنز پر آل آؤٹ ہوگئی تھی۔
مانچسٹر اولڈٹریفڈ کے میدان میں کھیلے جانے والے میچ میں انگلینڈ نے 96 رنز 4 کھلاڑی آؤٹ پر اننگز کا آغاز کیا۔
اس دوران انگلش بلے باز اولی پاپ ففٹی بنانے میں کامیاب ہوئے تاہم ان کی اننگز کا خاتمہ نسیم شاہ کے ہاتھوں ہوا۔
جس کے بعد انگلش ٹیم کا کوئی بھی بلے باز کھل کر نہ کھیل سکا اور یکے بعد دیگرے انگلینڈ کی وکٹیں گرتی چلی گئیں۔
انگلینڈ کی جانب سے اولی پاپ 62، بٹلر 38 اور اسٹورٹ براڈ 28 رنز بنا کر نمایاں رہے، پاکستان کی جانب سے یاسر شاہ نے چار، شاداب اور عباس نے دو دو جب کہ شاہین اور نسیم شاہ نے ایک ایک کھلاڑی کو آؤٹ کیا۔
اسپورٹس کے شائقین کے لیے شاندار کاوش ہے