بالآخر پاکستان کرکٹ ٹیم کے سابق کپتان شعیب ملک کا ٹینس اسٹار اہلیہ ثانیہ مرزا سے علیحدگی کی افو اہوں پر بیان سامنے آگیا ۔
گزشتہ سال نومبر سے ثانیہ مرزا اور پاکستانی کرکٹر شعیب ملک کے درمیان علیحدگی کی افواہیں گرم ہیں۔
خلیجی اخبار نے اپنی رپورٹ میں لکھا تھا کہ شعیب ملک اور ثانیہ مرزاکی شادی 12 سال رہنے کے بعد ختم ہونے کی اطلاعات سامنے آرہی ہیں۔
شعیب ملک اور ثانیہ مرزاکافی عرصے سے ساتھ دکھائی نہیں دے رہے،
اس دوران ثانیہ مرزا بیٹے کے ہمراہ اکیلے ہی عمرہ پر گئیں جبکہ انہوں نے کئی تقریبات میں شوہر شعیب ملک کے بغیر ہی شرکت کی جس کے بعد مداحوں کا خیال ہے کہ دونوں کے درمیان معاملات کشیدہ ہیں۔
شعیب اور ثانیہ کی جانب سے باضابطہ طور پر کوئی بیان سامنے نہیں آیا ۔
تاہم اب پاکستان کرکٹ ٹیم کے سابق کپتان شعیب ملک نے اہلیہ ثانیہ مرزا سے علیحدگی کی افواہوں پر پہلی بار لب کشائی کی۔
دوران انٹرویو ثانیہ سے علیحدگی کے سوال پر شعیب ملک نے میزبان کو کیا جواب دیا؟
عید کے اسپیشل شو میں پروگرام اسکور کے میزبان یحییٰ حسینی نے شعیب ملک سے پوچھا کہ خبریں چل رہی ہیں کہ بھابی ثانیہ مرزا کے ساتھ آپ کے تعلقات اچھےنہیں ، میں زیادہ گہرائی میں نہیں جاؤں گا، آپ عید کے موقع پر کیا جواب دینا چاہیں گے؟
جس پر شعیب ملک نے کہا کہ کچھ نہیں ، یہی کہ عید کے موقع پر میں اور ثانیہ ساتھ ہوتے تو اچھا ہوتا لیکن ان کی اپنی مصروفیات ہیں جس کی وجہ سے میں اور ثانیہ ساتھ نہیں ہیں۔
شعیب ملک نے کہا کہ ہمیشہ کی طرح دونوں کے درمیان پیار اور محبت موجود ہے،اس موقع پر پاکستانی کرکٹر نے اہلیہ کے لیے خصوصی پیغام میں کہا کہ میں ثانیہ کو عید مبارک بولوں گا،میں انہیں مسِ ضرور کرتا ہوں، عید کے دن ہم اپنے سب سے قریبی لوگوں کو ہی یاد کرتے ہیں۔
انہوں نےکہا کہ بیٹے اذہان سے دن میں 2 بار ویڈیو کال پر بات ہوجاتی ہے۔
